Ubuhamya
Amajwi
y’ababyeyi.
Ubuhamya bw’umuryango bugaragaza urugendo rw’umwana, ubufasha yahawe n’impinduka zabonetse.
Ubuhamya
bwemejwe.
Hano muzashobora gusoma ubuhamya bwemejwe bw’imiryango, abahanga n’abafatanyabikorwa. Niba namwe mwifuza kugira uruhare mu kunganira uru rupapuro, murahasanga umurongo wo kubikora hasi kuri uru rupapuro.
Ubuhamya bw’umuryango
“Ubuzima bwacu bwatangiye urugendo rw’ihinduka ryiza.”
Ubufasha bwihariye umwana yahawe muri Autisme Rwanda
Byari ibihe by’umwijima kubona umwana wacu ari gukura yitwara mu buryo budasanzwe, ibyo bikadutera kwibaza ibibazo byinshi ariko cyane cyane tukibaza tuti: “Kubera iki ari umwana wacu bibayeho?” Yatangiye ishuri ariko biranga, batubwira ko kuba atavuga cyangwa ngo akine n’abandi bidashoboka kuko mu mashuri y’inshuke baririmba bakanasubiramo inyigisho gusa.
Nibwo inshuti y’umuryango yaturangiraga Madame Rosine ukorera ku Gisozi, yongeraho iti: “Azabasuzumira umwana ababwire icyo gukora.” Ntitwazuyaje kumushyira umwana kandi guhera uwo munsi ubuzima bwacu bwatangiye urugendo rw’ihinduka ryiza.
Twashimishijwe n’ubunyamwuga bwa Madame Rosine ndetse n’ubushishozi mu gusuzuma. Yafashe umwanya yitegereza umwana wacu, atega amatwi impungenge zacu nk’ababyeyi, ndetse anadusobanurira buri ntambwe mu buryo burambuye kandi busobanutse neza.
Yatugiriye inama igira iti: “Muduhe uyu mwana muri Autisme Rwanda tumukurikirane kandi ntimuzatinda kubona impinduka nziza.” Icyadutangaje ni ukuntu umwana wacu yahawe ubufasha bumugenewe we wenyine, nta kumushyira mu bandi ngo akurikize gahunda yagenewe benshi. Mbese kumwitaho byagenwe ku muvuduko we, ibyo akeneye, amajyambere ye umunsi ku wundi akaba ari yo yagenaga ibikurikiraho.
Ikindi twakunze ni ukuntu twasanze tubyumva kimwe ku ngingo yo kutihutira gushyira umwana ku miti yo kumufasha gutuza no gusinzira. Autisme Rwanda yashyize imbaraga mu kumutoza ndetse no guharanira guhindura imyitwarire ye mu mimerere itandukanye kandi byatanze umusaruro ushimishije.
Umunsi ku wundi, umuhungu wacu ntiyahwemye gutera imbere: yaratangiye aravuga, atangira kumenya uko yitwara mu mimerere itandukanye, amenya kwisabira icyo kurya, gusinzira ataruhanyije, mbese mu buryo bwatangaga icyizere. Iyi ntambwe yagize akamaro kanini ku buryo atatinze kwinjira mu ishuri risanzwe, kandi kuva ubwo abihagazemo neza cyane.
Tubikesheje ubuhanga n’ubunyamwuga bya Madame Rosine ndetse n’ikipe y’abarezi ba Autisme Rwanda, umwana wacu yahakuye ibyo yari akeneye mu majyambere ye ya none ndetse n’ahazaza.
Ku bantu mwese muri kunyura mu mimerere twarimo mbere yo kumenya Autisme Rwanda, ntitwazuyaza na gato kubagira inama yo kwisunga ubunyamwuga n’ubuhanga biranga Madame Rosine mu rugendo rwo kubafasha kwita ku bana banyu.
Tubikuye ku mutima, turashimira Madame Rosine, mwarimu Gahongayire ndetse n’ikipe ngari ya Autisme Rwanda.
Ubuhamya bw’inzobere
“Icyankoze ku mutima kurusha ibindi ni uburyo aba hafi y’umwana.”
Ibyo Edmond Robe yabonye mu kazi Rosine akorana n’abana n’ikipe y’abarezi · Kigali
Ndabashishikariza cyane kuvugana na Rosine Duquesne Kamagaju, inzobere yahuguriwe ibijyanye n’autisme, nagize amahirwe yo kwitegereza akora mu ishuri rye i Kigali.
Ibyo nahabonye birenze kure ubunyamwuga busanzwe: ni uburyo aba hafi y’abana, imyitwarire ye n’uburyo yubaka umubano n’abana bafite autisme byankoze ku mutima cyane.
Rosine ntashyira mu bikorwa gusa amabwiriza n’inama ahabwa: ahubwo ubwe agaragaza icyo guherekeza no gufasha umwana bisobanura by’ukuri.
Buri gikorwa, buri jambo na buri ndoro bye bigaragaza ubwitonzi budasanzwe, ubugwaneza bugendana n’ubushishozi, ndetse no kubaha umwana byimazeyo uko ari.
Afite ubushobozi budasanzwe bwo kwinjira mu isi y’umwana ufite autisme, atamuhutaje kandi atamuhatiye kwinjira mu yacu.
Nabonye inzobere ishoboye:
- Gushyiraho ako kanya umwuka w’icyizere, utuma umwana yumva ko azwi, ko yumviswe kandi ko atekanye.
- Guhuza uburyo bwe bwo kuvugana n’umwana akoresheje ubushishozi n’ubwiyumvo bidasanzwe, ahinduranya ijwi rye n’imfashanyigisho z’amashusho kugira ngo asange umwana aho ari.
- Gutegura ahantu nk’icyari gituje kandi gitanga umutekano, ku buryo buri mwana ashobora kwisanzura, kumenya aho ari no gutuza.
- Gushyigikira ikipe bakorana agaragaza ubumuntu butera abandi imbaraga, kandi agaha umurimo wabo bahuriyeho umurongo umwe, igisobanuro n’urugwiro.
- Kubaha byimazeyo umwihariko wa buri mwana mu bijyanye n’uburyo yakira ibimukikije akoresheje ibyumviro, agahuza ibikorwa n’ubushobozi bwe mu bwitonzi, kugira ngo atamuremerera kandi yubahirize umwihariko we.
Icyankoze ku mutima kurusha ibindi ni uburyo aba hafi y’umwana.
Rosine ntahutaza kandi nta cyo ahatira umwana. Aramuherekeza. Aramwakira. Aramutega amatwi.
Abanza kubona umwana mbere yo kubona isuzuma ry’uburwayi bwe.
Abanza kubona umuntu mbere yo kubona ingorane afite.
Umurimo akorera i Kigali urenze kuba ubuhanga gusa: ni urumuri ku banyeshuri, ni ubufasha bw’agaciro ku miryango kandi ni isoko y’icyitegererezo n’imbaraga ku ikipe yose y’abarezi.
Ibyo atanga si ingirakamaro gusa: birakenewe, bihindura ubuzima, kandi birangwa n’ubumuntu bwimbitse.
Nifuzaga kugaragaza uburyo mwishimira cyane kubera ubwitange bwe, ubushishozi bwe n’uburyo bukwiye akoresha mu kazi ke.
Ibyo atanga bikwiye kumenyekana, gusangizwa abandi no kwishimirwa.
Uburyo bwe bwo gukora burenze urwego rw’akazi: ni uburyo bwo gusobanukirwa undi, kumwubaha, kumuha agaciro no kumurinda.
Ndasaba abantu kwitabaza Rosine Duquesne Kamagaju, mbivugana icyizere cyose kandi nshingiye ku buryo mwishimira cyane.
Ku bijyanye no gutanga ibiganiro, amahugurwa cyangwa ubundi bufasha aho ari ho hose ku isi, ni ijwi ry’ingenzi, inzobere idasanzwe kandi ni umuntu utera abandi imbaraga cyane mu rwego rwa autisme.
Ishimwe ry’umunyamwuga
“Ishimwe ku muntu w’indashyikirwa.”
Gukorana na Rosine no kwitegereza akora mu gihe cy’iminsi myinshi · Rwanda
Gukorana na Rosine ni ukwibonera buri munsi uko ubunyamwuga buhebuje bwuzuzanya n’umutima wuje impuhwe n’ubumuntu.
Rosine ni inzobere yitangiye umurimo wo gufasha abantu bafite autisme, kandi arangwa n’ubushobozi budasanzwe kandi bw’agaciro bwo gutega amatwi. Yita ku bana abigiranye urukundo n’ubwitonzi bitagereranywa, agashyigikira imiryango yabo adacogora, akanayobora abanyamwuga mu kazi kabo ka buri munsi. Ibyo akora bihindura ubuzima by’ukuri. Mu minsi namaze iruhande rwe, niboneye ko umurimo akorera abandi ufite imbaraga zidasanzwe kandi utanga impinduka zigaragara.
Ubwitange bwe burenga imipaka. Binyuze mu bikorwa bye birangwa n’icyerekezo mu Rwanda, asubiza abantu bafite autisme n’ababyeyi babo icyizere n’agaciro, yubaka inzira z’ubufatanye aho zari zikiri nke.
Rosine ni umwe muri ba bantu b’indashyikirwa bamurikira abandi, bakwiye kumenyekana, gushimirwa no gushyigikirwa. Ku bw’ibyo byose azanira urwego rwa autisme no ku bw’umutima we ugira ubuntu, akwiye amashyi n’icyubahiro bihebuje. Murakoze kuri byose, Rosine. 🙏💙❤️
Ubuhamya bw’umunyamwuga
“Ubuhanga mu isuzuma bugamije ubwigenge bwa buri mwana.”
Imikoranire y’abanyamwuga · Imitekerereze n’imyitwarire ya muntu, isuzuma n’ubufasha bw’inzobere zinyuranye
Nk'umunyamwuga mu by'imitekerereze n imyitwarire ya muntu (psychologue) wagize amahirwe yo gukorana na Madamu Rosine Duquesnes Kamagaju, nanejejwe n ubunyamwuga bwe, ubuhanga mu kwitegereza no gusuzuma ibimenyetso byo mu myitwarire y'umwana, ubuhanga bwo gutega amatwi, ndetse n'ubushobozi bwo gusobanukirwa neza ibyo buri mwana n'umuryango we bakeneye.
Nitegereje nanamwigiraho byimbitse ubuhanga bwe buhanitse mu gutanga ubufasha bukwiye, ndetse no guharanira gukorera mu bufatanye bw'inzobere zinyuranye, no guharanira ko abana bagira ubushobozi bwo kwiyubaka, kwigenga, guteza imbere impano n'ubushobozi bwabo, no kubategurira kwinjira neza mu buzima bw'imibereho n'ubwo gukora umwuga.
Komereza aho, Rosine! Urugendo rwawe ni icyitegererezo, kandi uruhare rwawe mu guteza imbere ubuzima n'ahazaza h'abana rufite agaciro gakomeye.
Ohereza ubuhamya